O día 18 de decembro é o día internacional do Migrante.
A presentación do documental “Museoloxía social. Culturas en diálogo: Lugo-Arxentina” o 17 de decembro ás 18h no Museo provincial de Lugo e súa exhibición os días 18, 19 e 20 nos museos da Rede museística supón o cume dun proxecto que comezou o 3 de febreiro e que vén a responder a unha liña da actuación constante desta Rede Museística: a responsabilidade social da institución pública.
Museoloxía social. Culturas en diálogo: Lugo - Arxentina é un proxecto de colaboración entre a Rede Museística Provincial de Lugo e as asociacións de Inmigrantes e Retornados Rioplatenses en Lugo e Tango Club Galicia, máis un equipo multidisciplinar de documentalistas, especialistas en redes sociais, investigadores, artistas, etc.. que traballan xuntos co obxectivo de investigar, documentar, conservar, reinterpretar e difundir a cultura de Lugo e Arxentina a través do diálogo intercultural e inclusivo.
Culturas en diálogo é unha viaxe en parella. Parellas artísticas internacionais como a colaboración entre Iago Eireos (Lugo) e Julia Romano (Arxentina), á que se uniu o poeta Miguel Ángel Curiel. Parellas literarias con Claudio Rodríguez Fer e o seu retrato de Borges, máis Paco Nieto que recolle as voces do panorama cultural de todos os tempos de Lugo. Parellas teatrais con Teatro Do Miolo & Cía, que vén a falar das dificultades desa viaxe de ida e volta que é a emigración. Parellas de baile, no V Encontro TangoLíber, onde ó redor de 100 persoas chegadas de todo o mundo reúnense baixo un interese común: bailar tango durante toda a fin de semana. Parellas patrimoniais, coa convocatoria artística que pon en valor os dous patrimonios da humanidade: a muralla e o tango. Parellas didácticas, con obradoiros para todos os públicos en novas tecnoloxías, creación artística, accións radiofónicas, que reflexionan e traballan sobre estas relacións culturais e sociais.
Parellas de aquí e dacolá. Destaca neste audiovisual a investigación sobre a Muller Emigrante en “Mulleres de Aquí e Dacolá”, onde facemos unha homenaxe a aquelas mulleres “ponte” e de ida e volta: ben sexan as que viaxaron desde a provincia de Lugo á Arxentina ou ben aquelas arxentinas que viven agora aquí. Neste apartado resumimos as 14 entrevistas a mulleres e familiares, artellando o diálogo en sete bloques que retratan a experiencia de emigrar. “Mulleres de aquí e dacolá” comeza cunha sinxela presentación onde remarcamos a importancia de dar nome ás súas protagonistas. En A muller emigrante recollemos que é o que elas percibían e como eran valoradas. De onde es? fala da supervivencia cultural noutro país a través da lingua, dos contos e da forma de relacionarse. Volver significou para moitas un momento de estrañeza e para outras un reencontro coas raíces. Remarcamos a Asociación, a colaboración entre emigrantes nun e noutro lado é esencial para a integración noutro país. En Emigrar queremos poñer en paralelo a situación da emigrante do pasado e da actualidade. Finalmente, con E agora, aquí ou acolá? dúas testemuñas poñen fin a este documental cunha reflexión sobre o feito de ir e volver.
Esta viaxe non remata aquí. Seguirá movéndose e descubrindo outras experiencias. Seguiremos investigando e poñendo en valor todas as expresións culturais que xorden desta profunda relación entre Lugo e Arxentina.
